Əmanət deyildiyi zaman bu, yalnız məhdud mənada, yəni verilən bir şeyi müəyyən müddətə saxlamaq kimi anlaşılmamalıdır. Hər bir vəzifə və məsuliyyət insan üzərində əmanətdir. Həmin vəzifə lazımi şəkildə yerinə yetirilməzsə, əmanətə xəyanət edilmiş anlamına gəlir.Quranda tərif edilən mömin dürüst, əmin və məsuliyyətli insandır. O, kiçik məsələlərin, kiçik mənfəətlərin ardınca qaçmır. Buna görə də ona verilən hər bir əhdi yerinə yetirdiyi və ya daşıdığı əmanətə ən gözəl şəkildə riayət etdiyi üçün tam etibar edilir. Möminlərin bu xüsusiyyəti Quranda belə mədh edilir:
“Möminlər əmanətlərini və əhdlərini qoruyub saxlayarlar!” (Muminun surəsi, 8).
“Onlar əmanətə xəyanət etməz, verdikləri sözü yerinə yetirərlər” (Məaric surəsi, 32).
“...Əhd edəndə əhdinə sadiq olanlar, dar ayaqda, çətinlikdə və cihad zamanı səbr edənlərdir. Doğru olanlardır. Müttəqi olanlar da onlardır!” (Bəqərə surəsi, 177).
Əhd etmək və əmanət saxlamaq məsələsində insanın daşımaq iqtidarında olmadığı yükün altına girməsi doğru deyil. Çünki verilən əhdə riayət etməmək, əmanətə xəyanət etməyin hesabı Allah dərgahında sorulacaqdır:
“...Əhdə vəfa edin. Çünki əhd cavabdehlikdir” (İsra surəsi, 34).
“Ey iman gətirənlər! Bilə-bilə Allaha, Peyğəmbərə və aranızdakı əmanətlərə xəyanət etməyin!” (Ənfal surəsi, 27).
Burada mühüm olan məqam, insanın bacaracağı işlərin öhdəsindən gələ bilməmək qorxusu, tənbəllik və buna bənzər səbəblərdən məsuliyyətdən qaçmamasıdır. Bacarmayacağı işi boynuna götürmək kimi, bacaracağı xeyirli işdən, məsuliyyətdən yayınmaq da insan üçün günah ola bilər. Məsuliyyət daşımaq hər zaman insanın öz seçiminə bağlı deyil. Özü də Allahın əmri kimi qəti itaət tələb edən hallarda möminin öz istəyi ilə seçim haqqı yoxdur.
Allah yolunda mübarizə aparılarkən hər kəsə öz təcrübəsinə və qabiliyyətinə görə müxtəlif vəzifələr verilə bilər. “Bacarmaram, mən bu məsuliyyətin altından çıxa bilmərəm” kimi bəhanələrin heç bir mənası yoxdur. Möminin tam itaət, saf niyyət və səmimi dua ilə ona verilən məsuliyyəti tam şəkildə yerinə yetirə bilməməsi üçün heç bir səbəb yoxdur.
